Phili 4 | ASO | STEP | Ne'mine iline' nenako nemu' nene neze zuho lu'ne lengeme mino lengikumu' oga' uvo aleve ado' mulu'neu' gulumo avile lisivo minaa' nouvo aleve ado' gono'neloti' gihile've gonolise nite' ne'mine do mineloni' alevekizo, ongovango lamii Guvelesi vela ele'vole' igi gi'mizi gili' li minilo.

Philippians 4

1 Ne'mine iline' nenako nemu' nene neze zuho lu'ne lengeme mino lengikumu' oga' uvo aleve ado' mulu'neu' gulumo avile lisivo minaa' nouvo aleve ado' gono'neloti' gihile've gonolise nite' ne'mine do mineloni' alevekizo, ongovango lamii Guvelesi vela ele'vole' igi gi'mizi gili' li minilo.

Ogo Molo Minaa' Monovomu' Lo nGolo' Lo Paulo' Lo-ngimine' Gamazi

2 Gaza Zuvodia' nesi ido' Sidike' gei' nesi lingine sitato' nene Guvelesi ve'mi evenele nizasine' nenaze. Lutine gatine di hamo' igi minilisive lo gatine do agae lo nolo-lingimuve. 3 Ee, ido' gono maka' daa' usive gihile geita nene ti' lo noluve: Alungo netise Izesu' gamazi lamine' nene di otilisa monoli'mi lovou' nene zege' zege' igi minasine' nenako nemu' nene gaza uva li di bizilisize. Hize ele' o-ngedelesane. Ee, inginesi nenikisi Kelemedokisi ido' gono maka' daa' unive lingesi nene makato' mono' gonou' nene zege' zege' une' ve. A'mine aleveti gulive'ine nene O'moso'mo minevo' minevo' ngemeni dameni ngemeliveti gulive'ine gize molaa' neine' buku'veu' nene gize neive. 4 Ido' lingine gamene gamene Guvelesi vemu' longolize izivo' minilo. Ido' gohi ti' lo noluve: Longolize izivo' minilo. 5 Hongu livo' minaa' nani' monovotine nene ningilizaze. Evene' mukita di soto' igi ngelebizilo. Guvelesi ve nene mo avito' oganaze. 6 Inite' mukikumu' muludine otavo gituho' namii mini asi a'mine inite' mukikumu' nene O'mosola li voku' laa' igi ido' isaa' neve laa' igi mini inite' mamu' longo' ilisa gilani' initekumu' nene O'moso li-imaa' igi minilo. 7 Ne'mine ikevo Izesu' Kilisitoda gi'mizi nizani' ne'mo O'mosolati' hongu monovo've ado' leli' evenelitesi gelaa' noune' nene ivile' goloso ivosa atoli'mine neine' ne'mo nene lutido' gatido' nene alete molo-lengedo gizebo oloseive.

8 Neze zuhokizo, gamazi ado' meve nene ma lo-lengemelouze. Gililo. Lingine minilizangu' nene monovo lamine' goloso ado' evenelite di hozi lilizado' lisihe' o noline' monovo nevo'minemukovo' nene gatine gilisa minilo. A'minguti' linge neve nene ado' inite' gihile laminekumupe inite' lisihe' gehepevemupe golososi minamine' initekumupe ninge lamine' daa' initekumupe inite' guvele laminekisi neine' initekumupe nevo'mine initekumukovo' nene gilisa minilo. 9 Ido' neni' apize lingimuvo nenitati' dani' monovosi ido' neni' noluvoo gilani' monovosi ido' ningi nizavo ogo molo uvoni' monovosi nene lingine di gono veleu' mili igi mili minilo. Ne'mine ikevo hongu lo lamino minaa' monovo do soto' o-ledaa' neine' O'moso ne'mo nene lengikisi mine molo minelive.

Paulo' Ebe' Mau' Galapusolo' Vo Neivo Hilipi Alevete Noso' Nitekisi Ido' Initekisi Nevo'mine Imangumu' Isetine Ve Lo nGopo'ni Line' Gamazi

10 Lingine gamene ha'na ha minisa nenikumu' gili nizani' monovotine nene gohi di soto' ani' nemu' nene Guvelesi vela nolize naba noizuve. Lingine gomu' nene nenikumu' gili minani'za a'mine nenikumu' ha gili minani' di soto' ilizani' aka nene ma soto' o-lengedamive. 11 Naza ne'mine mana'mine inite' soto' o-nidivoo mineloha a'mine ne'mingukisi nene lamine' minaa' monovo nene mo ningo otohato o nouvoni' nenako nemu' nene naza nolize noizuve noluvoni' nene naza initekumu' ma vise' ogosa inite' ma hize ele' i-nidilizave losa lamuve. 12 Gamene ma inite'ne nomivo vise' oga' uvoni' ve. Ido' gamene ma nene inite' mata' vai' ha neivo minaa' uvoni' ve. Nemu' nene ne'mine mana'mine ogo minaa' monovomu' nene mo otohato ogo mino mo hizo gele nouve. Ado' naza inite'ne vai' logavo gatu'ne ivosavo' minelohe ido' inite'ne nomivo vise' ogo ga'na helo minelohe olongukisi lamino minaa' monovo nene mo otohato ogo gele nouve. 13 Ee, nanite' nanite' soto' o-nedelihe a'mine mukiku' nene do amuzo molo-nedaa' ive Kilisitoda nene lehete o mino ele'vole' ogo ha ogo molo minelodo' o nouve. 14 Ne neiha lingine initedunu' hize ele' i-nidadi'mo neni' geni'ne gihuvongu' nene makato' lengikisi gihune' giline' nenako lingine monovo lamineto' e'meti ne'mine ani' nene mo lamine' ve.

15 Ido' Hilipi alevekizo, langisetine nene mo gili nizani' ma neive. Naza gana' ogo Kilisito' gamazi lamine' lo-lengemo minuvodoti' a'mine Makedonia misubotine hulo vuvongu' nene mono' mulise malitesi mono' gono'ne dalongumu' hize ele' i-nidi moni ma nimavo duvoni' nevoba asi lengikovo' nene ne'mine igi inite' nimavo nenikisi gono maka' gihuune' ve. 16 Ee, olihe misubo mala vamo ha Tesalonika numuno ebeta minuvongukisi vise' uvo inite' nene lengi' ma huli-nidi hize ele' i-nidani' nene gamene hamokovo' nevoba asi gohi gohi ne'mine ani' ma neive. 17 Lingine inite' ma nimilizave lo gele noosa noluvoba asi inite' ma nimikevo ne'mi gihile've nene vo naba ogosa a'mine gihile nene lengikumu' ha ize-lengede minelive lo gele minosa noluve. 18 Ne neiha inite' muki' naza vise' uvoni' votigile nene ivile' ivosi mo do osu' lokuve. Lingine huli-nidani' inite' nene Epahalodito' do nemavosa neni' votigilelo' nene vo dosa vai' lave. A'mine huli-nidani' inite' nene unuvo laminekisi inite' O'moso'mo ninge lamine' do mulunou' lamine' gelelido' o minine' inite' ne'mine nene lehizi-dave. 19 Ido' lingine Izesu' Kilisitoda gi'mizi minangumu' nene O'moso'ne ne'mo nene inite've atoli'mine ogo vai' goloso lo mininguti' nene lingine vise' iliza initeto' nene vauve elo golo hizo lengemo mineleseive. 20 Ido' meteho O'moso ei' opo'ni lo'mo vo minelone' nene osu' lamo mine do voovo' minelive. Mo ne'mino minilihoo.

Gamazi Gize Osu' Losa Paulolesi Maka' Minavete nGopo'ni Lani' Gamazi Gizine'

21 Naza Izesu' Kilisitoda vi gi'mizi O'moso'mi evenele lili' ave nene ngopo'ni noluze. Li-ngimilo. Leze zuho mela nenikisi maka' nonive nete longopo'ni nilaze. Li-ngimilo. 22 Ido' Izesu' evenele muki' nete longopo'ni nilaha engikuti' guvelesi ve naba Kaesale' numungu' minaa' ave nete nene longopo'ni naba goloso nilave.

23 Guvelesi ve Izesu' Kilisito' nasahili've nene lengi' lutingu' mine molo minivoo.